Buldhana Crime News | दुप्पट वयाच्या मुलाशी अल्पवयीन मुलीचं प्रेम जडलं, कॅफेत भेटायचं ठरलं अन् नको ते घडलं, घटनेने परिसरात खळबळ

बुलढाणा : Buldhana Crime News | सोशल मीडियावर ओळख झालेल्या मुलावर प्रेम करणं अल्पवयीन मुलीला चांगलंच महागात पडलं आहे. वयाने दुप्पट असलेल्या एका तरुणाने पीडित मुलीला प्रेमाच्या जाळ्यात ओढून कॅफेतच भेटायला बोलवून त्याच ठिकाणी तिच्यावर लैंगिक अत्याचार केला आहे. समीर राजू देशमुख (वय-२७, रा-दुधलगाव, ता-मलकापूर, जि- बुलढाणा) आरोपी तरुणाचे नाव आहे. या प्रकरणी पोलिसांनी बाल लैंगिक अत्याचार प्रतिबंधक कायद्यासह गुन्हा दाखल केला आहे. (Rape Case)

मिळालेल्या माहितीनुसार, आरोपी समीर आणि अल्पवयीन पीडित मुलगी यांची वर्षभरापूर्वी सोशल मीडियावर ओळख झाली होती. काही दिवस ऑनलाईन गप्पा मारल्यानंतर दोघांमध्ये प्रेम जडलं. मात्र हे प्रेम पीडित मुलीला चांगलंच महागात पडलं. वर्षभर संपर्कात राहिल्यानंतर आरोपीनं गेल्यावर्षी १२ डिसेंबरला पीडितेला भेटायला बोलावले होते. मलकापूर मधील ‘हँग आऊट’ कॅफेत दोघांनी भेटायचे ठरवले.

पीडित मुलगी या ठिकाणी आरोपीला भेटायला आली असता आरोपीने पीडितेच्या अज्ञातपणाचा फायदा घेत तिच्या इच्छेविरुद्ध कॅफेतच लैंगिक अत्याचार केला. या घटनेबद्दल घरच्यांना सांगितलं तर घरचे मारतील, या भीतीने घडलेला प्रकार मुलीने कुणालाच सांगितला नाही. मात्र घटनेच्या दोन महिन्यानंतर पीडितेने तिच्यासोबत घडलेला प्रकार आपल्या आईला सांगितला. यानंतर पीडितेने पालकांसह मलकापूर पोलीस ठाण्यात जात आरोपी समीर विरोधात गुन्हा दाखल केला आहे. पोलीस या घटनेचा तपास करीत आहेत.