Chandan Nagar Pune Crime News | पुणे: ATM मधून पैसे काढले, लॉजवर जाऊन भरपूर दारू प्यायला, 25 वर्षीय तरुणाचा मृतदेह आढळल्याने खळबळ

पुणे : Chandan Nagar Pune Crime News | लॉजवर २५ वर्षीय तरुणाचा मृतदेह आढळल्याने खळबळ उडाली आहे. आकाश सुनील साबळे (वय-२५, रा- चंदननगर) असे मृत्यू झालेल्या तरुणाचे नाव होते. आकाशला मागील काही महिन्यांपासून दारूचे व्यसन लागले होते, अशी माहिती पोलीस तपासात समोर आली आहे. आकाशचा मृतदेह चंदननगर परिसरातील पठारे मळा येथील श्री लॉजवर आढळून आला.

अधिक माहितीनुसार, शुक्रवार (दि.१४) आकाश हा रंग खेळल्यानंतर मद्यधुंद अवस्थेत त्याच्या मित्रासोबत साईनाथ नगर येथील श्री लॉजवर गेला होता. वारंवार त्याचे त्या लॉजवर दारू पिण्यासाठी येणे-जाणे होते. घटनेच्या दिवशीही त्याने एटीएम मधून पैसे काढून भरपूर दारू प्यायली. यावेळी त्याच्या मित्रांनी त्याच्या खिशातील पैसे काढून त्याच्या घरी नेऊन दिले. तसेच त्याला अस्वस्थ वाटत असल्याचे देखील सांगितले होते.

यानंतर दुसऱ्या दिवशी सकाळी त्याच्या मित्रांनी लॉजवर जाऊन आकाशला उठविण्याचा व आवाज देण्याचा प्रयत्न केला. परंतु तो झोपला असेल म्हणून त्यांनी त्याला उठवले नाही. त्याला झोपू दिले. त्यानंतर दुसऱ्या दिवशी दुपारी मित्र त्याला उठवायला गेले. त्याला जोराजोरात आवाज देऊनही तो न उठल्याने दरवाजा उघडून पाहिले असता त्याचा मृत्यू झाल्याचा संशय बळावला.

यानंतर पोलिसांना,माहिती देत आकाशला रुग्णालयात दाखल करण्यात आले असता त्याचा मृत्यू झाल्याचे समोर आले. याबाबत चौकशी करण्यात आली असता व त्याच्या घरच्यांना विचारणा केली असता त्यांचा त्याच्या मित्रांवर कोणताही संशय नसल्याचे वरिष्ठ पोलिस निरीक्षक सीमा ढाकणे यांनी सांगितले. आमचा या प्रकरणात तपास सुरू असून, सीसीटीव्हीच्या आधारे व अन्य सर्व बाबी आम्ही पडताळून पाहत असल्याची माहिती ढाकणे यांनी दिली आहे.