Sangli Crime News | 4 वर्षाची चिमुकली बेपत्ता झाली, अत्याचारानंतर गळा दाबून खून, नराधमानं मृतदेह पोत्यात कोंबून पेटीत ठेवला

सांगली: Sangli Crime News | चार वर्षांच्या चिमुकलीवर अत्याचार करून तिचा निर्दयीपणे खून केल्याचा धक्कादायक प्रकार जत तालुक्यातील एका गावात उघडकीस आला. याप्रकरणी उमदी पोलिसांनी संशयित आरोपी पांडुरंग सोमनिंग कळ्ळी (वय-४५) याला ताब्यात घेतले आहे. गुरुवारी (दि. ६) दुपारी १ वाजताच्या सुमारास हा प्रकार समजल्यानंतर जतसह जिल्हाभरात संताप व्यक्त झाला. पोलिस अधीक्षक संदीप घुगे, उपाधीक्षक सुनील साळुंखे यांनी गावात धाव घेत तपासाबाबत सूचना दिल्या.

मिळालेल्या माहितीनुसार, आज सकाळी बालिकेला शाळेत सोडण्यासाठी आजीने शोधाशोध सुरू केल्यानंतर गल्लीत ती बेपत्ता झाल्याचे स्पष्ट झाले. शेवटी गावात दवंडी देण्यात आली. पोलिस पाटील व ग्रामस्थांनी उमदी पोलिस ठाण्याला कळवले. पोलिसांनीही गावात येऊन शोध सुरू केला. सहायक पोलिस निरीक्षक संदीप कांबळे यांनीही गावात भेट दिली. ग्रामस्थ शोधाशोध करीत असताना गावातील एका पत्र्याच्या शेड समोर बदामाच्या झाडाखाली संशयित आरोपी पांडुरंग दारूच्या नशेत झोपलेला दिसून आला.

पोलिसांनी ताब्यात घेतल्यानंतर त्यानेच हा प्रकार केल्याचे स्पष्ट झाले. आरोपी गावातीलच असल्याने सकाळी नऊच्या सुमारास त्याने खेळणाऱ्या बालिकेला फूस दाखवत गावाजवळच्या एका शेडमध्ये नेऊन अत्याचार केले. त्यानंतर तिथेच तिचा निर्घृणपणे खून केला. या प्रकाराची कबुली त्याने पोलिसांनी खाक्या दाखवताच दिली.

या बालिकेचा खून करून आरोपीने तिचा मृतदेह पोत्यात कोंबून एका पेटीत ठेवला होता. त्याने गळा दाबून हत्या केल्याचे स्पष्ट झाले आहे. निर्दयी कृत्याबाबत पोलिसांनी अधिक तपशील देण्यास नकार दिला. पोलिस अधीक्षक घुगे म्हणाले, ‘प्रथमदर्शनी हत्या केल्याचे दिसून येते. वैद्यकीय अहवालानंतर तपासाची पुढील दिशा ठरवली जाईल.’

पीडित बालिकेचे आई- वडील रत्नागिरी येथे मजुरीसाठी असतात. सध्या ती तिच्या आजीकडे गावात राहत होती. सध्या मुलीची आई प्रसूतीसाठी कर्नाटकातील मुधोळ गावी गेली आहे. बालिकेवरील अत्याचाराचा प्रकार उघडकीस आल्यानंतर संपूर्ण गावात खळबळ उडाली आहे. सायंकाळी बालिकेचा मृतदेह जत ग्रामीण रुग्णालयात आणण्यात आला होता. त्यानंतर शवविच्छेदनासाठी मिरज शासकीय रुग्णालयात नेण्यात आला.