Ladki Bahin Yojana | लाडकी बहीण योजनेतून 5 लाख महिलांना वगळलं, मंत्री आदिती तटकरे यांनी दिली माहिती

मुंबई: Ladki Bahin Yojana | विधानसभा निवडणुकीत मुख्यमंत्री माझी लाडकी बहीण योजना गेमचेंजर ठरल्याचं पाहायला मिळालं. दरम्यान आता या योजनेबाबत मोठी अपडेट समोर आली आहे. राज्यातील जवळपास ५ लाख महिलांना या योजनेतून वगळण्यात आल्याची माहिती महिला व बालविकास मंत्री आदिती तटकरे (Aditi Tatkare) यांनी दिली आहे.

मंत्री आदिती तटकरे यांनी आपल्या पोस्टमध्ये म्हंटले आहे की, दिनांक २८ जून २०२४ आणि दिनांक ३ जुलै २०२४ रोजी निर्गमित करण्यात आलेल्या शासन निर्णयानुसार अपात्र ठरणाऱ्या महिलांना ‘मुख्यमंत्री माझी लाडकी बहीण’ योजनेतून वगळण्यात येत आहे. पुढे त्यांनी यापूर्वीच्या लाभार्थी महिलांना लाडकी बहिण योजनेतून वगळल्याचे देखील स्पष्ट केले आहे.

संजय गांधी निराधार योजनेच्या लाभार्थी असलेल्या महिला २ लाख ३० हजार , वय वर्षे ६५ पेक्षा जास्त असलेल्या महिला १ लाख १० हजार, कुटुंबातील सदस्यांच्या नावे चारचाकी गाडी असलेल्या, नमोशक्ती योजनेच्या लाभार्थी असलेल्या, स्वेच्छेने योजनेतून नाव मागे घेणाऱ्या १ लाख ६० हजार अशा एकूण ५ लाख अपात्र महिलांना लाडकी बहीण योजनेतून वगळण्यात आले आहे. तसेच इतर सर्व पात्र महिलांना मुख्यमंत्री माझी लाडकी बहीण योजनेचा लाभ देण्यासाठी महाराष्ट्र शासन कटिबध्द असल्याचे आदिती तटकरे यांनी एक्स वरील पोस्टमध्ये म्हंटले आहे.