IMPIMP

Murlidhar Mohol | मेट्रो उदघाटनावरून केंद्रीय मंत्री मोहोळ यांचे टीकास्त्र; म्हणाले – “विरोधकांना राजकारण कशाचं करावं हे कळत नाही”

September 27, 2024

पुणे: Murlidhar Mohol | पंतप्रधान नरेंद्र मोदी यांचा (दि.२६) नियोजित पुणे दौरा रद्द झाल्याने राजकारण तापल्याचं पाहायला मिळालं. मोदींच्या हस्ते स्वारगेट ते जिल्हा न्यायालय या मेट्रोच्या विस्तारित मार्गाचे उदघाटन करण्यात येणार होते. पाऊस आणि कार्यक्रमाच्या ठिकाणी मोठ्या प्रमाणात चिखल झाल्याने पंतप्रधान मोदींचा नियोजित पुणे दौरा रद्द करण्यात आला.

आता राजकारण बाजूला ठेवून मेट्रोचे उद्घाटन ज्येष्ठ नागरिकांच्या हस्ते करून शिवाजीनगर ते स्वारगेट हा भुयारी मेट्रो मार्ग नागरिकांसाठी खुला करावा आणि पुन्हा एकदा कार्यक्रम घेऊन लोकांच्या पैशाचा चुराडा करू नये, अशी मागणी विरोधकांकडून करण्यात आली. दरम्यान आज (दि.२७) विरोधकांकडून या मुद्यावरून आंदोलन करण्यात आले. (Pune District Court To Swargate Metro)

या सर्व बाबींवरून केंद्रीय सहकार राज्यमंत्री मुरलीधर मोहोळ यांनी विरोधकांवर निशाणा साधला आहे. ते म्हणाले, “पाऊस असल्याने कार्यक्रम रद्द केला. कार्यक्रम झाला असता तर वाहतूक प्रश्न वाढला असता, नागरिकांना त्रास झाला असता, नागरिकांना त्रास होणार नाही याची काळजी म्हणून कार्यक्रम रद्द केला.

पुण्यात नवीन मेट्रो मार्गाला परवानगी मिळेल, मेट्रोचं जाळं वाढवण्याचा आमचा प्रयत्न आहे. राजकारण कशाच करावं हे विरोधकांना कळत नाही. त्यांच्या काळात विरोधकांनी काय केलं? असा प्रश्न उपस्थित करत पुणेकरांना सगळ समजतं असेही मोहोळ यांनी म्हंटले.

ते पुढे म्हणाले, “सरकारी कार्यक्रम आहे. सुरक्षा महत्वाची आहे. खर्च होतो आणि झाला आहे. परंतु, निसर्गाबद्दल कुणाच्या काही हातात नाही. पावसाची शक्यता नसती तर कार्यक्रम झाला असता. प्रत्येक टप्प्याला मोदी का असा प्रश्न विचारला जातोय. पण असंच मेट्रो जगात सुरू होते.

निवडणुकीत काय होतं हे लोकसभेला लोकांनी दाखवले आहे. किती तरी नेते कोरोना काळात दिसले नाहीत, पुणे मेट्रोला विरोध करणारे आता मेट्रो उद्घाटन करत आहेत, असा टोलाही त्यांनी लगावला.

पंतप्रधान नरेंद्र मोदी यांच्या हस्ते (दि.२९) रोजी ऑनलाईन पद्धतीने मेट्रो उद्घाटन व विविध विकास कामांचा उद्घाटन व भूमिपूजन होणार आहे. दरम्यान, मुख्यमंत्री दोन्ही उपमुख्यमंत्री या कार्यक्रमाला उपस्थितीत राहणार आहेत. गणेश कला क्रीडा मैदान येथे हा कार्यक्रम होणार आहे अशी माहिती मोहोळ यांनी दिली आहे.