अहमदनगर: Attack On Nilesh Lanke Supporter | अहमदनगर लोकसभा मतदारसंघात निलेश लंके (MP Nilesh Lanke) आणि सुजय विखे (Sujay Vikhe Patil) यांच्यात लढत झाली होती. दरम्यान निवडमुकीच्या काळात दोघेही एकमेकांवर टीका करताना दिसत होते. या निवडणुकीत पारनेर तालुक्यात दोघाही उमेदवारांच्या समर्थकांनी टोकाचा विरोध करत प्रचार केला.
प्रचार काळातही छोटे-मोठे वाद झाले होते. निकालानंतरही सोशल मीडियातील पोस्टवरून वादाचा भडका उडताना दिसून येत आहे. आता मात्र निकाल हाती आल्यांनतर कार्यकर्त्यांमधील खदखद बाहेर पडताना दिसत आहे.
पारनेर तालुक्यात गुरूवारी दुपारी दोन ठिकाणी लंके आणि विखे समर्थकांमध्ये राडा झाला. पारनेर बसस्थानकाजवळ खासदार लंके यांचे समर्थक राहुल झावरे यांच्यावर प्राणघातक हल्ला झाला. हल्लेखोरांनी त्यांच्या वाहनाचीही तोडफोड केली.
यामध्ये जखमी झालेल्या झावरे यांना उपचारासाठी जिल्हा रुग्णालयात दाखल करण्यात आले. दरम्यान आता तालुक्यात पोलिसांनी बंदोबस्त तैनात केला आहे.
मिळालेल्या माहितीनुसार, गुरूवारी दुपारी ही घटना घडली याची सुरूवात गोरेगाव येथून झाल्याचे सांगण्यात येते. पहिली घटना गोरगाव येथे घडली. सोशल मीडियातील वाद यामागील कारण असल्याचे सांगण्यात येत आहे. त्यानंतर पारनेर शहरात बसस्थानकाजवळची घटना घडली.
तेथे राहुल झावरे आपल्या वाहनातून जात असताना हल्लेखोरांनी त्यांची गाडी अडवून हल्ला केला. गाडीच्या काचा फोडण्यात आल्या. झावरे यांनाही मारहाण झाली. त्यात झावरे जखमी झाले आहेत. त्यांना उपचारासाठी जिल्हा रुग्णालयात दाखल करण्यात आले.
याबाबत पोलिसांकडून घटनेची नेमकी माहिती घेण्यात येत आहे. त्याचा अधिक तपशील अद्याप समजू शकलेला नाही. झावरे यांच्यावर झालेल्या हल्ल्याचा खासदार लंके समर्थकांनी निषेध केला आहे.