पुणे: कंत्राटदार तुपाशी आणि कामगार उपाशी अशी वेळ आल्याने वीज कंपनीतील कंत्राटी कामगारांकडून विधानसभा अधिवेशनादरम्यान ९ जुलै रोजी मुंबईतील आझाद मैदानावर ‘सरकार जगाओ’ आंदोलन करण्यात येणार आहेत.
राज्याचे उपमुख्यमंत्री तथा ऊर्जामंत्री देवेंद्र फडणवीस यांनी वीज कंत्राटी कामगारांना दिलेल्या आश्वासनाची पूर्तता प्रशासनाने करावी या मागणीसाठी आज विविध जिल्ह्यामधील जिल्हाधिकाऱ्यांना याबाबतचे निवेदन देण्यात आले आहे .
महाराष्ट्रात देखील हरियाणा सरकार प्रमाणे कंत्राटदार मुक्त जॉब सिक्युरिटी द्यावी, वेतनात वाढ करावी, वीज कंपनीच्या होऊ घातलेल्या भरती मध्ये वयात वाढ, आरक्षण द्यावे या मागण्या “सरकार जगाओ” आंदोलनाच्या माध्यमातून करण्यात येणार आहेत.
दरम्यान आज महाराष्ट्र वीज कंत्राटी कामगार संघ (संलग्न भारतीय मजदूर संघ) तर्फे ज्योती कदम निवासी जिल्हाधिकारी पुणे यांना निवेदन देण्यात आले. यावेळी भारतीय मजदूर संघ पुणे जिल्हाध्यक्ष अर्जुन चव्हाण, पुणे झोन अध्यक्ष सुमित कांबळे, पुणे झोन सचिव निखिल टेकवडे, चंद्रकांत नागरगोजे, राहूल बोडके, उमेश आणेराव आदी उपस्थित होते.
राज्यभर कंत्राटी कामगारांचे कंत्राटदारांच्या मार्फत होत असलेले आर्थिक शोषण व त्यास अधिकाऱ्यांचे अभय व संगनमत असल्याने कष्टकरी कामगाराला पूर्ण वेतन मिळत नाही. बोनस नाही, पेमेंट स्लीप नाही, डोक्यावर सतत रोजगाराची टांगती तलवार, जीव कधी जाईल सांगता येत नाही, अपघात झाल्यास विमा नाही या बिकट अवस्थेत कामगार वर्षानुवर्षे सेवा देत आहे. यांच्या वेतनात वाढ करून हरियाणा सरकार प्रमाणे मध्यस्थी कंत्राटदारांना बाजूला सारून उपकंपनी तर्फे थेट कामगारांच्या बँक खात्यात वेतन देण्याची मागणी यावेळी करण्यात आली.
ऊर्जा मंत्री यांनी दिलेले आश्वासन पाळावे, त्याबाबत तोडगा काढावा असे महाराष्ट्र विज कंत्राटी कामगार संघांचे अध्यक्ष निलेश खरात, महामंत्री सचिन मेंगाळे यांनी यावेळी सांगितले.